鬼地方!

今朝去見客, 不過好快見完就好早番到油塘附近, 唔想番公司住, 因為公司個internet 有問題仲未上到網, 預備去食個早lunch之際, 就見到有間髮型屋!

之前已經覺得把頭髮好大把周身唔舒服架喇, 又唔想去電髮, 咁就求其搵間修修佢囉! 係間髮型屋門口我已經睇入去望下咩料, 見到門口又播d video, 講佢地好似有去做比賽, 又好似做d咩show咁, 我估應該ok, 咁就入左去!

洗完頭, 個五十幾歲染到好似亞Lo咁嘅髮型師就過嚟問我想點整喇! 我話想修修, 因為覺得好重, 但係又唔想剪得太短! 講完之後, 亞Lo髮型師就開始so quality喇!

佢一睇就話我把頭髮都電左幾耐下, 因為"塔塔地"! 佢問我係唔係過年前電喎! (我個心諗真係廢話!) 我答佢係過年前電, 不過唔會咁快又電, 因為半年到先電一次, 唔想傷髮! 佢可能見sale我電髮唔work, 就開始又問我把頭髮係唔係冇乜做黑, 因為好黑! 我答佢, 黑色好吖, 呢兩三年都興黑架! 同埋, 染左之後冇幾耐又要補染, 好煩! 佢聽到我咁講, 就話唔染成個頭都可以high light! high light??? 我話我好似廿幾歲興過之後就好似冇再興過喇喎! 講完, 亞lo髮型師居然同我講: "唔會架! 即係等同好似女人sexy一樣, 唔會話唔興架喎!"

佢一講完呢句之後, 我就好反感囉! 我只係第一次入去呢間髮型屋到剪頭髮, 第一次都唔使講埋d咁嘅嘢嘛! 如果唔係洗左個頭係到剪緊, 我會走囉!  佢一路再講, 又問我有冇睇尋晚金像獎, 我已經開始唔想答佢, 只係一味係咁睇本八婆雜誌, 中途又有兩個電話嚟, 講完我又即睇本雜誌, 但係我估唔到條友都仲係要講!

剛剪完, 其實我覺得佢係識剪頭髮呢方面係ok架, 不過把口就唔得囉! 剪完就開始整乾d頭髮喇, 我把係卷髮, 跟本就唔使用風筒吹架, 但係條友居然好似吹直髮咁幫我吹, 拉到去d頭髮一半就唔吹喇! 去到呢個位, 我冇出聲問佢點解咁攪, 因為我想睇下佢有咩花臣! 佢吹晒成個頭嘅頭髮一半之後, 原來! 原來! 原來佢想同我set 頭呀!!!

真係唔想話佢唔係痴撚線都唔得囉! 我嚟剪髮, 仲乜無啦啦同我set頭呀! 大佬, 我仲要番工架, 番到公司, 想嚇Q死人咩!!! 所以, 我見佢想同我卷起D髮嚟吹時, 我就即刻stop佢, 我話唔使set, 因為我要番工, 我唔想嚇襯人! 條友聽到, 佢都好婉轉咁話好啦, 下次先幫我吹靚d去街喎!

到臨走, 條友都仲要叫我考慮下下次整high light 喎! 因為葉德嫻都有整番兩三條係前面喎!

真lai嘢!!! 我今日咩事, 仲要入左間咁樣嘅鋪頭架!!!