我終於明白喇!!!

呢兩日, 耐唔耐都問下滕滕去唔去玩POLICEMAN, 佢嘅答案唔係好似最尾夜晚答我嗰一次話去, 而係仍然都係話"唔去!"

我仍然繼唔放棄去問佢, 仲咩事咁驚, 因為我要知道原因先可以解決到問題!

我: 其實你究竟驚咩啫? 你係唔係驚我掉抵你先?

滕: 唔係呀!

我: 咁你係唔係覺得我會走左去唔番嚟吖?

滕: 唔係呀!

我: 咁你知道我唔會掉抵你, 又唔會唔理你走左去, 咁你仲驚乜???

滕: 唔知呀~ 總之好驚啦!

我: 咁我都同你講, 我同其他爸爸媽媽都一樣係出面等你地出嚟, 咁你都仲驚? 我講明唔會走架喎!

滕: 係呀! 我都仲驚架!

我: 咁我係出面等你, 都唔會有得走架啦, 咁你即係怕裏面有人捉你走???

滕: (好用力咁點頭!!!) 係呀!!!

嚟到呢到, 我終於明喇!!! 星期六朝早, 我係屋企上蘋果網睇報紙, 其中一篇報導係講有拐子佬想捉走一個9歲嘅小朋友, 咁我就叫滕滕一斉睇, 原因係想比佢知, 而家呢個年代係有捉小朋友嘅拐子佬, 等佢知道有陌生人捉佢時, 一定要大聲叫唔好, 要叫救命, 同埋, 等佢知道係一個多人嘅地方一定要拖實我地, 唔可以自己行開, 因為會隨時比陌生人捉走! 就係因為咁, 滕滕就唔願意去一個地方, 係唔能夠同我一斉嘅!

好多時有D新聞, 我都會比滕滕睇, 等佢知道有D咩係應該做, 有D咩係唔應該做, 做左之後嘅後果會係點! 因為好似D小朋友膠鞋咁會ZIP住係扶手電梯到, 我比D新聞佢睇完, 佢去到搭電梯我提醒佢時, 佢會答我: "我知道喇, 我會小心!" 但係我勢估唔到, 滕滕會咁入腦, 攪到而家個膽細左咁多!