為咩呢~???

請左個工人之後, 發覺原來屋企多左個唔係屋企人, 係好唔舒服, 因為當有一次抄左個工人, 而個新工人第二日先嚟, 咁係嗰一晚, 種感覺真係寧舍唔同, 好爽好自己好舒服!!!

其實都算係迫於無奈先要請工人番嚟湊仔, 就係因為要靠佢同我湊仔, 所以我覺得, 都唔可以對個工人太差, 而且我本身都唔係d會好黑薄嘅人, 所以我覺得同我打工, 都唔算好辛苦, 因為佢只係做到我要佢做嘅嘢, 打後我就會唔多理佢, 尤得佢自由發揮, 而且遇到有咩節日我係唔使番工, 又唔多需要佢, 我就會比半日假佢出去同朋友見面! 原因係, 我都唔想成日對住個工人!

馮小姐好攪笑咁同我講, 佢專登叫個工人唔好放25号星期日, 提前一日星期六放, 因為佢25号去奶奶到食飯, 佢要個工人同佢睇仔, 佢自己攪唔掂喎, 而跟住個星期一都唔比個工人放, 因為佢放假, 所以要個工人係屋企做嘢!

我唔知佢同我講嚟仲咩, 係唔係佢覺得自己好勁, 可以洗到個工人好盡,自己就可以舒舒服服唔使做呢? 佢話佢老公話佢咁衰, 聖誕節正日都唔比個工人放假喎!  其實, 佢都知道我同佢嘅諗法都唔同, 佢鐘意下下都同個工人計到足一足, 小小嘢都要捉個工人, 而我, 就擺明比個工人有小小水腳濕, 既然大家都唔啱傾, 可唔可以唔好再同我講佢個工人d嘢呢??? 

既然咁巴閉下下都針住個工人, 咁個手提申請嚟無限上網, 連搭車番屋企都話要睇住個仔, 又為乜呢??  跟住又話想係屋企裝多隻眼,連個工人偷雞食小小嘢都要睇到佢, 咁又何苦呢???