希望等多十日, 個AGENT 同我講個工人已經OK啦, 因為係呢段時間裏面我日日反眼, 冇日不反!
唔知呢D工人咩心態, 係唔係日日要比人小下佢先覺得舒服! 叫佢咁做, 佢就唔理你, 自己鐘意點做就點做, 叫佢唔好, 佢就偏偏就去挑戰你! 呢幾日, 日日都好凍, 我就要日日朝早出門口同佢講, 究竟要同滕滕著咩衫! 日日咁凍, 跟本就可以唔使講, 但係呢個工人唔講唔得! 仲要下下要同佢講得清清楚楚, 講完之後都仲要叫佢同我講一次, 因為佢話明, 其實佢係唔明! 想唔反都唔得!
煮餸, 到今時今日, 佢睇咁多書, 煮D餸都冇好食過, 不過係佢當初話佢煮餸唔係好得, 所以我可以容忍佢, 不過容忍係有限度架, 已經唔使佢煮, 等我番嚟整, 叫佢只係預備好D嘢, 佢都冇一樣係可以做得到!!!
個個星期日, 我就要做家務, 因為個工人唔知點解, 抺極個地都有垃圾! 初初佢抺地之前係冇掃地, 比我發現左之後就要佢掃左地先抺地, 但係到今時今日為止, 地下都仲係好多粒粒嘢! 隻豬仔有時又好曵, 執到D嘢叫佢比, 佢就偏要放落口! 張SOFA, 唔知有冇買錯, 因為D隙全部都有垃圾, 例如好似乾左嘅飯粒同埋餅乾碎, 個個星期日唔開吸塵機係唔得! 仲有張膠墊, 膠墊下面, 都不知有幾多頭髮痴住左, 我都唔明, 已經日日攞起張膠墊抺地同掃地, 都唔知點解咁都睇唔到!
你話幾攪笑呢~ 個工人今晚走嚟同我講, 佢好耐冇番印尼見個仔, 佢想問我佢幾時可以番去喎! 11月18日先到, 頭頭尾尾兩個月都冇就同我講佢想放假喎! 之前係AGENT到都已經講過, 就算比佢番印尼, 都要3/4月先可以, 而家未夠兩個月就想番, 好, 你唔使心急, 你就嚟可以一去不返架喇!!!
轉啦，轉個好啲架啦)))
回覆刪除[版主回覆01/07/2011 17:18:00]我都好希望可以轉個個好, 不過我開始有d驚..........
平常心啦，驚都無用，你可以叫個新工人去你屋企試一日嘛?有日同我老闆講開你個case,問佢有無一啲好工人想轉換下工作環境，諗住彈一個比你嘛。 佢話請工人之前，叫啲人係佢屋企試一日，煮下飯，湊下bb咁
回覆刪除[版主回覆01/09/2011 16:40:00]我諗個AGENT 自己張自己嗰個比我, 唔會衰得去邊卦, 我諗起碼應該唔會衰過而家嗰個吖!
有時我覺得試工作用唔係太大, 因為佢想嚟你到做, 試工嗰一日一定做到最好啦! 同埋再加上而家D工人咁高, 又話唔要做新界, 有D又話係做兩歲以上唔做NEW BORN, 又有D又話唔要有CAM, 而家唔係我地撰佢, 係佢撰我地咁!
如果我真係要按我自己要求唔降低D, 我諗我一年都唔知搵唔搵到呀!
所以但求個工人湊得滕滕好就算啦, 煮餸家務最多自己辛苦D都算喇! 更何況而家我都要做家務啦!
希望黎梗呢個合你心意啦，人夾人緣係咁架喇
回覆刪除[版主回覆01/10/2011 09:50:00]只要佢唔好錯完又錯, 錯完又錯就得喇!
好似呢個咁錯咁多次都繼續錯, 你話佢幾有心機吖!
你唔使心急, 你就嚟可以一去不返架喇!!! →
回覆刪除[版主回覆01/15/2011 23:31:00]係佢自己攞嚟架!