呢句嘢, 應該係我講先啱!

到左4月14, 我就已經就嚟係呢間公司做左5年, 係呢5年裏面, 都係第一次, 亦希望係唯一嘅一次, 就係我老闆第一次同我發皮四! 佢雖然向我發皮四, 但係唔係鬧我, 而係話我嗰個同事+朋友!

上個再上個星期六(即係兩個星期前嘅星期六), 已經試過一次, 係有隻柜上唔到船, 因為海關玩嘢! 同埋呢隻柜已經因為改左船名嘅問題, 已經 delay左一個星期架喇! 所以上次老闆已經問, 點解我個同事+朋友唔直接打去廠, 直接同報關嗰個講有關事兒; 點解唔直接打上去大陸? 原因係佢冇申請長途! 所以佢打嚟比我, 同我講完之後, 叫我用公司手提打上去, 同佢地講! 當時老闆知道佢冇長途而叫我打上去, 已經反一反左眼, 因為唔係卦, 而家居然都仲有人冇申請長途??? 係! 真係有人係咁, 因為孤寒, 唔會打比佢係外地d朋友, 所以佢冇申請! 好啦, 攪一大爛餐, 終於攪掂左嗰隻柜! 不過, 好可惜, 上個星期六又嚟, 今次仲要係兩隻潻!

老闆一聽到, 又有兩隻又上唔到船, 跟住就開始興興地! 話點解我嗰個同事+朋友唔主動打電話上大陸問下究竟點, 成日等等等, 可唔可以主動d架, 打個長途要幾錢呀, 咁做嘢法咁得架! 直接d, 就係話叫先識去做, 唔叫就唔識做! 可唔可以醒目d架!!! 係最後, 老闆仲講左一句: 我最錯就係比你地星期六on-shift, 就算冇嘢做, 坐係到stand-by都好, 好過而家咁!

講真, 我從來都冇見過老闆咁架!!!  所以一出左佢房門口, 我就即刻打比個同事+朋友, 同佢講老闆炸型, 問點解之前係咁, 上個星期六又係咁, 個個星期六都係咁, 而且佢負責呢part嘢架嘛, 仲咩唔直接打比大陸, 下下都要搵我打上去! 因為本身報關嗰個都好攪笑, 有事就鐘意直接打比我嗰個同事+朋友, 唔鐘意就打比廠另外一個同事! 所以明明可以攪到, 都變左攪唔到! 所以其實我嗰個同事+朋友 & 呢個報關嘅同事, 跟本兩個都有問題!

我同個同事+朋友一講, 佢就即刻又死撐, 佢話佢有打, 仲叮囑嗰個報關同事, 有問題就即刻打比佢喎! 叮咩囑呀?! 我同佢講, 個問題係你冇打去跟進呀!!! 佢二話不說, 仲要好勞氣話佢有打上去, 叫佢有咩打比佢! 喂, 你明唔明咩叫跟進呀!!! 佢唔打比你, 你可以打比佢問佢點架, 唔係下下都等! 等! 等! 等! 請你番嚟, 唔係叫你等架, 亞姐!!! 我又再一次話佢, 唔係只係老闆覺得你有問題, 而係我都覺得呀!!!

蝦! 你估都估唔到, 佢居然話: 既然佢咁講, 我都冇嘢好講!!!

第一, 你有打上去, 同佢講, 第一時間有問題, 就即刻打比你-----> ok, good!

不過, 你見佢地唔覆, 咁你可以打上去啦, 半個月前你唔知公司幫你登記左你手樹可以打 IDD, 但係星期六之後, 你知啦嘛, 咁你可以打啦, 但係點解你又唔打呢?! 你話你唔知佢地做嘢做成咁??? 你唔係嘛, 你40都嚟緊, 做嘢最少都做左起碼廿年, 係之前間公司你都要同大陸廠溝通架啦, 你唔好同我講你而家先知呀!!!

好喇, 而且出現左問題, 你居然同我講你覺得你自己冇問題, 仲好盡力! 唔係卦, 你好盡力??? 如果盡力, 你就唔會準時收工, 日日就遲番工啦, 比你出去放單, 早左成個鐘放早, 你都可以唔慚愧?! 話你唔啱, 你仲要話你冇嘢好講! 

老闆都算係咁啦! 明知叫你出去放單係擺明比你早走, 你上次攪到我火滾, 係老闆叫我原諒你架! 你老豆死左, 老闆同你講, 成個星期你邊日有事辦, 就隨時晏番又或者早走都可以! 過年, 老闆買埋賀年禮品比我地去拜年, 你都好似有一份! 連係咩中秋、做冬、聖誕節、徐夕, 老闆成完 lunch之前冇耐, 都話做好晒嘢就可以早d走! 而家你做錯嘢, 就話老闆好咁話你?!

你冇嘢嘛!!!!!!!!!!!!!!!!!!!!!!!!!!!

如果唔係我將你係舊公司救左你出嚟, 你而家都賤過地底泥!  而家個老闆咁好, 你都咁講嘢, 夠薑嘅話, 你辭職啦, 唔好做囉! 嗱, 我比十萬個膽你, 你都唔敢呀! 唔好話我睇死你呀!!!