升華~

今晚去左錦田食印度餐, 不過因為滕滕冇瞓晏覺, 所以中途去緊就瞓著左, 到左餐廳都未起身!

老公抱住滕滕, 去到呢一刻, 我又已經知道佢想點! 我都未講到出聲, 佢又啜落滕滕到, 啜完又啜! 果然不出我所料, 啜完我就已經啤行老公, 因為滕滕又比佢啜醒左!

比人攪醒, 邊個都唔鐘意啦, 尤其係小朋友, 就更係忟憎d!

以為佢好開胃食個薄餅啦, 食完個薄餅, 就乜都唔肯再食! 再叫佢(只係叫), 佢就已經好大聲話: 唔食呀!

去到呢個階段, 我就知道滕滕已經又升華左! -就係發皮4咁大聲鬧人!

"我唔要呀~!", "唔食呀~!", "唔好講呀~!" 係好自由咁盡情地大聲鬧你!

之前, 都係轉開個頭話唔食唔要, 一係就唔理你! 而家呢, 係反抗, 大聲話比我地知佢極度唔想!

而今晚係餐廳到, 佢好大聲咁話 "我唔食呀!", 感覺真係都幾瘀, 不過好在, 我地食飯時間尚早, 餐廳唔係好多人!