尋日, 有個舊同學打電話嚟, 呢個舊同學好日都唔會搵我, 而上次搵我, 係問我借錢!
尋日因為都幾忙, 所以佢打電話嚟問我可唔可以講兩句, 我就同佢講可以, 不過要快. 佢聽到我話要快, 跟住佢就話冇咩喇, 搵我吹水啫!
尋晚又打多次嚟, 不過我夜晚番到屋係, 係最唔得閑嘅時候, 所以我連電話都冇聽!
今日, 佢又打嚟, 因為要預備滕滕瞓下午覺, 所以我同佢講我要同個仔瞓覺, 一陣晏D先覆佢!
我個心已經唔知點解覺得, 佢係想搵我借錢! 無事不登三寶殿, 一搵就係咁搵我, 如果真係想吹水, 都要大家得閑先吹啦, 聽到我咁忙都再打嚟, 咁即係真吹水都有限, 所以直覺上佢係想問我借錢?!
我都唔明, 點解咁多人問我借錢??? 唔通覺得我真係好有錢咩? 如果我真係好有, 我唔使做啦! 如果我有, 我平時使乜咁慳先得架! 我自己每朝都係食一塊方包做早餐咋, 我連食個早餐都唔捨得, 只係有時可以借家E, 可以去下麥記, 一年數晒一隻手5隻手指, 5次都冇呀!
我同老公講, 話個同學打電話嚟, 佢就話, 如果我錢多, 不如擺係佢到, 費事我借晒D錢比人!
死啦, 個同學都唔知會唔會再打嚟, 我都唔知點推佢呀!
所以呢...我鍾意whatspp比人，家下好似個個都好忙，我唔係公事，電話都唔敢打呀... 其實，你可以話滕滕要開始返學，用咗好多錢，又要同阿媽去旅行諸如此類推咗佢囉...
回覆刪除[版主回覆10/03/2011 11:59:00]其實我好唔鐘意用電話send message架, 以前因為send message 唔同台要比錢, 而家有左whatsapp, 我都唔鐘意, 因為我覺得好煩!
我未正式同嗰個同學講過電話, 因為佢次次打嚟我都真係唔係好得閑, 同埋, 我估佢應該都係問我借錢, 冇走雞, 咁我更加無奶油自投羅網架嘛!!!
p.s. 我已經係fb到post左我好窮, 希望佢睇到而又醒目啦! 不過佢唔多上fb..........
想揾你笨囉!你都知道你係幾好人架啦!不過要有事先揾你,佢真係唔係當你係好朋友!如果唔係太熟嘅,你咪直接話無囉!朋友,同學之間講到錢真係唔係咁好!
回覆刪除[版主回覆10/11/2011 12:41:47]其實我識d朋友全部係好耐架, 因為出左嚟做嘢, 除左係blog識左你地之外, 我都好少新朋友!
所以呢個朋友識左好多年! 有朋友同我講, 叫我識得say no, 但係, 如果佢地問我借得又唔係多, 我真係唔識推囉, 因為如果佢真係唔掂到要開口問我借, 咁我say no的話, 咁即係表示我唔想幫佢!
不過, 最後原來佢打嚟唔係問我借錢, 而係八人地d嘢借! 好彩! 好彩! 好彩!