自從呢個星期日日放工番到屋企見到滕滕, 佢個樣目冇表情, 好似好耐都未笑過, 同佢玩, 都冇好似之前咁咁high, 唯一聽到, 就係佢成日喊!
所以老公今日放假, 就叫左佢去紙札鋪買d嘢燒下, 真係要燒下, 因為滕滕好似成日都好唔安心, 一定要我或者個工人係佢旁邊, 佢先冇乜嘢, 自己一個係廳睇碟都唔肯, 係咁喊!
老公話佢記得上個星期五, 佢有個同事去完泰國玩完番嚟之後, 就見佢嗰個人條頸上面有條佛珠鏈, 佢冇掂過, 只係望到, 但係, 佢就話自嗰日起, 滕滕比佢一抱, 就喊到九彩咁! 所以去到紙札鋪同嗰到d人講, d人就話如果佢冇掂過條鏈, 應該唔會有事, 但係都唔緊要, 照執比佢燒, 仲要燒之前要將其中一份掃佢個身前面三下, 後面三下, 一路掃就要一路講: 大人有大諒, 得罪左就有怪莫怪, 而家燒番d嘢比你, 請你走啦! 跟住再噴d口水落去先燒! 係預備之前要點著d 蠟燭同香, 不過係嗰時, 就開始落毛毛雨, 同埋, 用左十幾支火柴都未著到一支!
好喇, 整左好耐, 終於都著左喇, 咁我地就放碗飯, 切開左個梨, 用嗰份指明嘅掃完老公之後, 我地就開始燒衣紙喇! 都差唔多整左成個鐘先番到屋企, 一番到去, 燒埋佢比嗰道附, 跟住就加埋d碌油葉比老公照頭淋! 淋完之後, 成個過程就完成晒喇!
係老公完成最尾嗰個儀式之前, 我就去個廁所先, 不過, 係個廁所到, 我就發現有袋牙菜同豆腐係地下(因為呢兩袋嘢, 係要落去燒衣紙嗰時, 一斉拜埋架), 跟住, 我就大叫問點解仲有袋嘢係地下架, 想點呀, 有冇攪錯!!! 不過, 都已經番左嚟喇, 漏左都冇計, 所以都要照做埋剩餘嘅步驟啦!
老公攪掂晒所有嘢之後, 我就叫佢餵奶, A, 果然好似有D用喎, 因為滕滕比佢抱左之後, 就冇乜爭扎, 只係望住支奶係我叫咋!
希望燒左嘢之後真係有用啦! 因為滕滕成日咁驚都唔係辦法架, 因為佢而家晚晚都醒, 醒左就好似瞓唔得番咁, 個身左轉右轉!
沒有留言:
張貼留言