給公老的情信..........

老公,

 

今朝起身聽到新聞報導話碧咸因為腳傷唔能夠參加今年嘅世界杯...............! 世界杯? 原來四年一度嘅世界杯又嚟喇!

 

諗番起嗰年嘅世界杯, 我同個朋友係到飲緊嘢, 撞到個同事(即係你朋友)就同佢打聲招乎, 而呢一聲招乎就改變左我嘅一生!

 

第四年喇, 今年係我地一斉過嘅第四年世界杯, 因為已經係第四年, 唔知你仲會唔會同我一斉出去睇波呢?!

 

曾經你講過無論我摷皮摷到成個亞婆咁, 你都會錫我、攬我、拖住我!

曾經你講過無論我個樣變左一個肥婆, 你都話好可愛, 因為d肥豬肉dum 下dum 下, 好得意! 

曾經你講過無論我個身材會變成點, 你都話唔會離棄我!

 

好開心, 你而家瞓覺嗰時仲有時會攬住我, 出街嗰時會拖住我, 但係我又想問多次, 到我60歲嗰時, 係唔係都係咁呢?!

 

舊年我地家庭有一新突破, 因為我地多左個滕滕豬, 呢隻豬仔攪到我地好鬼死忙, 成日都好唔得閑, 一放工、放假d時間就比晒佢, 就連我地臨瞓前嘅喁喁細語嘅時間都冇埋, 怕嘈醒佢! 所以基本上我地嘅時間就已經唔係我地架喇!

 

滕滕豬係上天賜比我地嘅一份禮物, 而呢份禮物, 我地足足等左三年, 係呢三年裏面, 由開始唔係好緊張, 攪到個個月都好緊張! 係嗰個時刻, 好多謝老公你無限嘅容忍, 因為我都知你有壓力, 但係又唔想比我知你唔開心, 所以每一次都好盡你嘅能力去做到最好! 我知好多時我無形咁比左好大壓力你, 但係你都處處去配合我!

 

多謝你! 直至滕滕降臨左係我身上, 我可以真正咁感受佢到每一日係我個肚到郁動, 我可以感受到佢係我個肚到同我容為一體, 我亦都可以感受到呢個就係我地兩個嘅結晶品..........

 

今年踏入第十一年喇, 十一年話長唔長, 話短唔短, 係呢十一年裏面, 大抄小抄, 乜都抄過, 就係因為有抄過, 所以我地先至可以有今時今日!  我希望到60歲嗰時, 仲係同你頂緊咀, 仲係比你話緊我嗌交唔執輸, 但係, 唯一我唔想見到嘅, 就係到時你都仲係係到跳蛇舞嚟激我囉!

 

老公, 再問多你一次, 到我60歲, 你係唔係仲會攬住我瞓覺呀? 仲會唔會拖住我去街先? 同埋仲會唔會錫我呢個摷晒皮嘅咀呢?!