家長日!

今日係第一次家長日, 同滕滕番學校見老師, 見完, 原來老師嘅魔力係咁大架~

老師話滕滕係學校都幾乖, 以前做每一樣嘢都好急, 專注力唔夠, 而家就學識左等待, 忍耐同埋可以開始用心聆聽(不過都係短暫)!

係學校乖, 但係係屋企唔係呢, 又擒枱, 叫極又唔聽, 我係屋企就仲死多兩錢重, 食飯就曵到嘔血, 又掟車又食紙巾又食手指, 總之差唔多乜都做斉!  牙又唔肯刷, 我係到時飯就唔肯自己食!

老師問係唔係因為我好少時間陪佢, 可能佢想引我注意, 其實少時間就更架啦, 每晚放工番到嚟都7點幾8點, 玩得嗰一陣就要上床瞓覺喇, 夜左瞓, 第二朝佢就同我講"軒軒唔起身呀~!" 所以最多時候陪佢, 咪就係星期六&日囉!

老師又話, 滕滕好多自己應該要做識做嘅嘢, 佢都唔多出手, 例如去攞書包, 將個杯杯同毛巾盒放番落去, 但係隻豬仔就唔攞, 要老師幫佢攞埋書包, 打開個袋, 佢就放入去喇! 例如好似著褸咁, 同佢穿左隻袖, 佢都唔申隻手出嚟!  我同老師講, 我都唔想咁, 因為個工人成日都想快D攪掂佢, 等得佢嚟, 個工人都幫佢做左, 最緊要係唔好阻住佢做嘢, 我已經都話過個工人唔可以成日幫佢做晒, 不過耐何我唔係係屋企, 只有就係不停咁同個工人講, 叫佢唔好幫滕滕手!

仲有, 老師話滕滕係學校比小朋友推倒, 唔識話比佢知喎! 老師話滕滕唔知道咩係佢自己嘅權利喎! 嘩~ 唔係嘛,咁細個邊知道自己有咩權利呀, 你估係佢亞媽我咩?! 所以由而家起, 我不停咁同滕滕講, 係學校比人蝦, 要同老師講呀!!!

同老師一路傾, 老師就問滕滕點解係屋企咁曵, 而隻豬仔就當然唔答啦! 但係, 番到屋企, 藥力開始發作喇, 滕滕開始樣樣嘢都話自己做, 自己做!

嘩~ 點解老師可以咁勁嘅???!!!