節目豐富~

尋晚飲到醉醉地, 攪到今朝成十二點先起身! 一起身, 滕滕已經係時候食lunch喇! 可能隻豬仔知道我地唔使番工就一定有街去, 所以lunch碗飯食左半碗就唔食喇!

第一程, 我地去左飲茶! 今次比滕滕食左好多嘢, 有千厚糕啦, 包包, 蘿蔔糕, 仲有就係炸雲吞! 最緊要, 就係呢d嘢放係碟同隻碗到, 而滕滕就自己食晒, 我一d都冇幫過手! 所以食嘢又有進步喇~

食完嘢, 我地就去左市中心, 倍老公去睇電話, 又去左JUSCO買水壺比隻豬仔, 跟住又去左 H & M! 呢隻豬仔, 真係貪靚都冇人有, 又要戴帽, 又要試鞋, 跟住仲唔肯走! 

行完一輪, 番到屋企都成四點幾, 一抱上手, 叫佢合埋雙眼啦, 就即刻冧左!

未完架, 因為番左屋企一陣, 五點我地就出發去沙灘喇!

一落沙第一下, 只係驚嗰一下, 之後就冇嘢喇, 仲從來未試過, 坐左45分鐘都冇郁過呀!

如果佢係屋企都係咁, 你話幾好呢, 唔好講45分鐘, 如果有15分鐘我都願喇!

玩左差唔多一個鐘, 我地就走, 番屋企喇, 因為太陽佰佰都落左山喇!

今日滕滕只係瞓左15-20分鐘到, 我諗佢今晚應該唔會醒喇卦~