真係咁可悲~?

今晚見到個同學係fb個status 到投訴佢老公好少時間係屋企, 番嚟又卦住講電話, 同仔女&自己嘅溝通時間越嚟越少!

見到之後, 個心灰左一灰, 因為自己都生左一個, 生左一個之後, 同老公嘅關係已經有所改變, 變左冇咩時間二人世界, sweet 都唔好講, 連有時想傾下計都冇乜機會, 因為大家一上到床, 唔係我就係佢, 都已經好快瞓著! 再講, 自從有fb之後, 老公就好多時番到嚟都係打機、打機& 打機! 佢有次問我, 點解滕滕成日都要住我, 我就答佢, 更係啦, 佢晚晚都同我瞓, 我放工番嚟就同佢玩, 上左床我地就睇一陣書仔, 又唱下歌, 請問你做過d咩呢, 佢唔黐住我, 唔通黐你咩! 我講左呢番說話之後, 老公開始有小小改變! 唔係對我好左囉, 而係對個仔好左!

人地唔知就以為生左個bb, 應該係一家好幸福、好sweet, 好似好完美家庭咁! 其實我都想啦, 嗰d完美家庭, 只係限於唔擔錢, 生活無憂嗰d囉! 生活無憂, 我都想想地, 不過都只係想想地咋, 因為到左生活無憂嗰時, 個老公又唔知變左點喇, 都有講啦, 男人有多d錢就身痕架喇, 就好似我以前公司d sales 咁, 未搵到就同老婆好好, 見佢由開始搵到, 到搵到好多之後, 就成日上大陸叫雞, 就連同事都唔放過, 都要揪一揪水!

我朋友, 有兩個小朋友, 我生一個都已經鬼死咁唔得閑, 佢兩個我就更加想像到佢有幾忙, 因為個工人又走左未到, 又要番工, 不過好彩份工唔使一定要番公司, 所以先可以留係屋企睇住對仔女, 而佢老公, 就早出晚歸, 番到嚟d仔女都已經瞓晒喇, 所以我都好明白佢幾想佢老公係屋企, 就算幫唔到多嘢, 起碼都想佢睇下對仔女, 希望放鬆一下都好!

有陣時同家姐傾開, 都講究竟生多個, 係唔係真係咁worse, 係唔係同老公嘅關係越嚟越唔好呢?! 講真, 有幾多個男人真係可以幫到手湊仔吖, 幫小小都已經好好啦, 既然自己個老公都唔係有咁多耐性去幫手睇仔, 咁係唔係生多個就更加多問題產生呢?! 我有時自己都係到諗, 老公成日都要番工, 好多嘢都係自己攪掂, 如果生多個, 究竟自己承唔承受到嗰種壓力先?!

唉! 人生有時真係好可悲, 人地睇生左一個就好似好幸福, 再生多個就好似好完滿, 但係佢地又唔知生左一個個壓力已經好大, 再生多個d壓力就仲多, 雖然生左真係好開心, 但係又有另一方面嘅煩惱呢, 所以係唔係真係有咁多嘅happy family 先!