病倒了!

尋晚滕滕瞓到十二點幾, 係睡夢中佢同我講個喉嚨痛痛, 第一次以為佢發夢, 點不知過左一陣, 佢又再講多次! 我見到佢咁, 我都覺得佢唔妥, 已經同老公講如果聽日個仔唔舒服, 就叫佢同佢去睇醫生喇!

點不知凌晨四點幾, 滕滕真係發燒, 一探已經102喇! 好彩屋企有退燒藥咋, 比左佢食就再瞓番, 晨咁早8點就出門口去dr到攞籌睇醫生!

同滕滕睇完醫生, 食左藥, 佢好似已經冇晒事, 而我, 就唔知點解成身軟晒, 個頭又痛番, 所以原本諗住番半日, 但係最終都係上左車打比老闆, 跟住就落番車番左屋企, 因為老公叫我唔好番工抖下!

以為放半日可以番去抖下, 點不知番到屋企食左小小嘢, 一上床隻豬仔就醒左, 而且仲唔比我瞓, 我話瞓床, 佢話唔得, 瞓sofa陪佢, 都話唔得, 我叫個工人同我按摩個頭, 佢又話唔得, 我Q埋隻瞓HEA係sofa到, 佢都唔比, 我要將雙腳放係地下!

咁嘅情況, 就知我今日咁早番屋企, 跟本就係冇得瞓!