我成日講嗰個家姐, 係我堂家姐, 佢個仔細滕滕6個月, 所以少不免我地成日都會講下仔經, 就係成日會講仔經, 咁我好多時都會同佢講滕滕嘅進度比佢知, 尤其係滕滕每每識得一d 新嘢!
每當我同家姐分享滕滕又識左/做左樣新嘢時, 佢就話佢個豆豉一早已經係咁! 其實佢都唔係而家已經咁講, 係由滕滕1歲左右, 即係佢個仔6/7個月嗰時, 都已經成日話佢個豆豉已經識! 有時我個心諗, 細6個月差好遠架喎~ 滕滕識反應識同我玩都係呢半年有多嘅事, 之前都仲係一嚿小小飯, 就算有反應, 都唔係好似而家滕滕咁, 咁古古惑惑, 所以我真係唔係好信佢個豆豉好似滕滕而家咁囉~!
雖然個個都話唔好比較, 但係佢咁講法, 就攪到我個滕滕好似好蠢咁, 明明可以好似佢個豆豉咁細個已經一早識, 而我個滕滕就到而家先識!
就好似見姑姐嗰一次咁, 佢就叫我唔使擔心, 因為都未必係, 只係可能, 跟住我又再同佢分析有三樣基本特質, 滕滕都唔覺係, 但係佢又話係因為個腦下垂體有問題佢先會出現呢d特徵, 但係我又真係好想問, 乜個腦下垂體有問題, 唔係就有問題嘅咩? 乜有間歇性咁出現問題架? 乜如果有自閉, 就會間歇性自閉, 間歇性唔閉架?
有陣時真係唔係好想再傾囉, 成日就話佢個豆豉一早已經識, 佢雖然唔係專登晒佢豆豉叻, 但係唔多唔少就好似話緊我個滕滕蠢囉!
你滕滕蠢? 我ANSON仔點算呀? 唔好比呀~~~~
回覆刪除你講得好好笑 "乜如果有自閉, 就會間歇性自閉, 間歇性唔閉架?"
其實你真係冇必要太早擔心自閉症問題, 因為要知道有冇呢個問題, 係要等佢地入學讀書後先可以CHECK到. 要睇埋佢地D專注力. 佢地咁細個係冇人可以話你知係唔係O架.
而且要CHECK都要搵專家評估O架.
[版主回覆10/05/2010 10:19:00]我好明白佢而家咁細個, 更係唔係樣樣嘢都做得到啦, 有d BB講嘢早, 有d BB行路早, 有d做身體語言就好叻, 例如好快就識得bye bye或者拍手! 個個進度都唔同!
不過我已經擔心架喇, 同佢分析完之後佢冇安慰不突止, 仲同我講有d係間歇性, 好似話叫我唔好咁快判斷滕滕係冇咁! 真係有小小嬲嬲地!
我會一路留意多d滕滕架喇, 同埋再問多d接觸過自閉性嘅朋友, 如果第日姑姐真係可以幫我問到點樣可以去做檢查, 我就會同滕滕去check check架喇!
差幾個月當然係差好遠啦!好似你細幾個月未識行住,又點同一啲大咗幾個月的比較先得架,他比你大,一定識行先過你架!無可能你當家姐個仔同滕滕同一時間識行架!?有時都係你當家姐又真係誇咗少少呀!
回覆刪除我個仔好多嘢都未識呀,只係識得拍手掌,人地比嘢佢就一定要拿囉!仲有我教佢拍嘴叫"娃娃",佢都未係好識,有時候佢仲自己打自己的眼,面,還有額頭,真係比佢氣死呀!其實呢個時候都唔知道個仔應該學啲咩呀!
[版主回覆10/05/2010 10:30:00]唔知係唔係我表達得唔清楚呢, 因為我想同佢講, 滕滕可以同我互動, 而我就好簡直咁講滕滕識得!
就好似排氣咁, 滕滕飲完夜奶就同我玩排氣, 佢排完一次就有啖細細, 咁我咪讚佢叻仔囉, 咁滕滕知我讚佢, 佢就專登再比多一啖大嘅我(我睇到佢係運功排出嚟), 跟住我又再好開心咁又讚多佢一次叻叻, 跟住滕滕又即刻再比第三啖我, 不過呢啖就嘔左啖奶出嚟喇!
好似以上嘅互動, 我同家姐講滕滕同我玩排氣, 佢就第一時間同我講佢個豆豉一早已經識, 但係原來佢個豆豉識排氣, 並唔係好似滕滕咁同我玩排氣!
我覺得滕滕1歲之後, 好多嘢都好明白, 當我地同佢玩嗰時, 佢知道點樣比番反應我, 當我要佢做某個指令時, 佢識得follow 我嘅要求(咁當然要佢心情好嗰時啦!) 所以未夠一歲都仲係嚿飯都好正常啫(我覺得)!
不過, 1歲真係一個轉捩點, 因為1歲之後就好似大解放, 好多嘢我都比佢食, 比佢試, 同埋1歲之後, bb 開始好多嘢都好明白, 所以1歲之後, 真係好好玩 !
你家姐個仔仲細過你個仔，有乜可能乜都識過你個仔呀?
回覆刪除[版主回覆10/05/2010 10:31:00]所以有時我個心係想同佢講下滕滕嘅進度, 去到咁嘅年齡原來會做d咁嘅嘢嗰時, 佢就第一時間同我講佢個豆豉一早都做左, 就好冇引囉~ 有意冇意就係到讚緊佢個仔!!!